UP CM Yogi Adityanath Ram Mandir Bhoomi Pujan Ki Taiyariyon Ka Jayeza Lene Pahuche Ayodhya


Aane waale 5 August ko Ram Mandir ke liye bhoomi pujan hona hai, jisme PM Modi aayenge. Usi program ki taiyari ki sameeksha ke liye aaj UP CM Yogi Adityanath Ayodhya pahuche. Yahan pahuchne ke baad CM ne sabse pahle Ram janam bhoomi sthal pahuch kar Bhagwan Ram ki pooja ki. Ram janam bhoomi parisar me CM Yogi Adityanath ne Ram mandir nirmad ki taiyariyon ka jaayeja liya. District Administration Officer or Ram Janmabhoomi Tirtha Kshetra Trust Officers maujood rahe.

CM Yogi ne kaha ki, PM Modi Ayodhya jaayenge. Hum ayodhya ko Bharat or World ka gaurav banayenge. Swachta pehli shart honi chahiye. Ayodhya ke liye self-discipline ke madhyam se apni kabiliyat ko sabit karne ka mauka hai or jis tarah se duniya ise dekhne ki ummeed karti hai. Unhone kaha ki, hum sabhi ek subh karyakram ke liye ek sath aayenge. 4 or 5 August ki raat ko sabhi gharo or mandir me 'Deepotshav' hoga. Diwali Ayodhya se judi hai or Ayodhya ke bina tyohar ki kalpana bhi nahi ki ja sakti.

Iske baad Uttar Pradesh ke CM Yogi Adityanath Shri Ram janam bhoomi tirtha kshetra trust or local administration ke members ke sath baithak ki. Ram ji ke darshan ke baad CM Yogi Hanumangarhi pahuche. Is dauran suraksha ki drashti se police ne aam logo ka aana-jana pratibandhit kar diya. Yogi jab bhi Ayodhya jaate hai, wo Hanumangarhi jarur jaate hai. Hanumangarhi me pooja ke baad CM Karsewakpuram jaayenge or wahan Santon ke sath baithak karenge.

Is baithak me 5 August ko hone waale program ko lekar charcha ki jaayegi. Karsewakpuram wahi jagah hai jahan par pattharon ko tarsane ka kaam kiya jaata hai. Ram mandir nirmad ke liye prayog kiye jaane waale Patthar yahin khoobsurat roop le rahe hai. Malum ho ki Corona sankraman ke mamle pradesh me badhte ja rahe hai. Is beech CM ke is daure ke dauran bhi sabhi log ahtiyaat baratte najar aaye.

Shree Ram Mandir nirman ke liye bhoomi pujan samaroh me shamil hone ke liye Ayodhya aane par PM Narendra Modi Hanumangarhi mandir jakar Bajrang Bali ke darshan poojan karenge. PM banne ke baad Narendra Modi ka yeh pahla daura hoga. Bata de Shree Ram janam bhoomi tirtha kshetra trust ne Ram Mandir ke naye model par muhar laga di hai.

0/Post a Comment/Comments